政壇：搞搞政：又為港把脈林奮強憂閉島
前行政會議成員、香港黃金五十創辦人林奮強，每隔一段時間就會為香港「把脈」，佢尋日以「回顧及展望」為題舉行記招，預言本港有三個樽頸位要克服，其中一個係港人「關門閉島」嘅心態要改變，舉例指唔可以動輒以蝗蟲來形容個人遊旅客，以偏狹目光看待佢哋。佢建議本港旅遊業要做好硬件設施，歡迎佢哋來港先啱，咁就可以推動服務業，促進經濟發展。
設計圖片及對白
另外兩個樽頸分別係土地及勞工嚴重不足，林奮強建議由今年起每年輸入三千個外勞來港，按年增加一千個名額，以應付二○二○年起每年少二十萬的勞動人口。
講明反對全民退保
林奮強其後連最近熱議嘅全民退休保障建議都要加把口評論，佢講到明唔贊成推行，又話呢種隨收隨付制度，會隨着退休人口超越納稅人口，破產收場，之後又再次力銷佢建議多時嘅關顧長者未來生活建議，包括增建九間公立醫院，新增一萬九千張床位，以及十八區建長者中心，令退休長者老有所依。
話時話，林奮強一時話香港發展「三樽頸」，一時又話「黃金五年」可以延長至一六年，究竟邊句先係佢嘅真心話呢，或者係解決問題嘅真正良方，呢個相信只有佢自己至知嘞！
