阿里巴巴嚟緊好快就喺美國公開招股,正所謂人逢喜事,日前阿里公布嘅季績多賺1.8倍至123.44億元人仔,令到公司嘅內部估值衝破萬億元人仔後,彭博社億萬富翁指數就率先幫馬雲嘅資產計數,發現四十九歲嘅佢身家已經飆升至218億美元(約1,700億港元),即時坐上中國首富嘅寶座。

四十九歲嘅馬雲身家飆升至218億美元,坐上中國首富嘅寶座。

作為中國最大嘅電子商務公司,阿里呢排就努力準備緊美國IPO,預計下個月就會喺紐約證券交易所上市,呢單嘢仲可能喺美國史上規模最大嘅IPO個案,阿里市值估計都有1,540億美元。至於馬雲名下嘅資產,佢依家持有8.8%嘅股份,唔計當中1.5%由馬雲慈善組織控制嘅股權權益,佢實際持有嘅股票價值有113億美元。加埋之前冇計入去佢身家淨資產值嘅支付寶母公司近半數股權,佢就搖身一變成為中國首富喇。

第一手消息請下載on.cc東網iPhone/iPad/Android/Windows Phone Apps