政壇：周驄想當年KK化身小粉絲

工聯會屬下嘅工人俱樂部屹立香港五十年，發展規模之大絕對唔止賣主題樂園折扣票咁簡單。工聯會尋日特別喺土瓜灣嘅俱樂部總部舉行慶祝酒會，勞工及福利局局長張建宗、教育局局長吳克儉等官員都畀面出席。不過喺芸芸工聯會之友同政界人士當中，見到著名甘草演員周驄（驄叔）都係座上客，唔通驄叔都係工聯會資深會員？

周驄（右）捉住黃國健（左）一齊話當年。

驄叔笑言，自己不但係工聯會之友，俱樂部總部一磚一瓦佢都有份出錢出力！驄叔透露，五十年前佢係華南電影工作者聯合會（影聯會）成員，由於影聯會同工聯會好老友，所以佢得悉工聯會正四出籌錢興建俱樂部總部，即刻動員演藝界兄弟參與義演籌款，總部入伙當日佢都有到場，見證俱樂部多年來的成長。

工聯會副會長KK黃國健一見到驄叔即化身小影迷，話有睇驄叔拍嘅電視劇！但講到對工聯會嘅感情，年逾八十嘅驄叔即時插嘴，笑指KK「五十年前佢仲着緊開浪褲咋！」前輩咁講，KK亦惟有認輸，即時投降。