全國人大副秘書長李飛下周一來港出席政改簡介會，解說人大對一七年特首普選訂下嘅框架，而最令人意想不到嘅係政改簡介會遠離市區舉行，選定喺亞洲博覽館舉行，而非灣仔會展。有獲邀出席嘅政界中人勁呻，政改固然係重要議題，親身出席聽取解說本屬無可厚非，但要山長水遠入去亞博館，始終都無咁方便。

之不過去得亞博館舉行，自然饒有深意。有熟悉籌辦大型活動嘅地區人士分析，由於佔中三子早前事先張揚，如果人大決定不符國際標準就會啟動一波又一波行動，加上綜合近日政界消息指，一七年特首普選很大機會係「高門檻」方案，評估到時會有大批示威者到場示威，因此講到底，政改簡介會遠離市區舉行都係因為安全系數高啲。該地區人士補充話亞博館出入口多，似足迷宮，到時若有示威者狙擊京官，退守亦冇難度，幾乎係零風險嘞！

第一手消息請下載on.cc東網iPhone/iPad/Android/Windows Phone Apps