政壇：黃汝璞食黑色早餐護髮

香港女工商及專業人員聯會尋日公布新一屆「傑出專業女性及女企業家選舉」嘅得獎名單，選出具卓越專業成就、對社會有貢獻或有創業精神嘅女士，我哋見創會會長黃汝璞（圖）雖然年輕時做會計師日捱夜捱，但依然保養得宜，原來佢好注重飲食同運動，每朝都食黑色嘅早餐嚟護髮添！

黃汝璞

黃汝璞三年前開始，每朝早都會食一碗由黑米、黑芝麻、黑豆等等材料製成嘅粥，食咗之後感覺髮質強韌咗，味道又比麥皮更香濃，所以一直食到依家。佢仲日日食五種水果，包括早上食嘅奇異果同藍莓，加上適量運動，難怪皮膚同身形都保持得咁好。