政壇：曾浩輝中年危機樂清閒
衞生防護中心前總監曾浩輝已經退咗休一年半，大家都好關心佢去向，但佢就好享受清閒嘅人生。尋日佢出席一個活動時，又被問到呢個問題，事關佢咁後生又咁叻，冇理由就咁退休？曾浩輝就笑稱，佢唔會考慮做執業醫生，如果獲邀去大學教書，佢都只會客串吓，唔收錢。佢笑笑口答：「可能係中年危機喇！真係要停一停，諗一諗」。
設計圖片及對白
曾浩輝尋日出席母校華仁書院的籌款記者會時，透露有朋友想搵佢幫手做嘢，但如果係全職或受薪工作，佢就通通拒絕，佢話：「返大學教書講課無問題，只要唔受薪就OK，好似客串吓咁就得。」問到佢會唔會考慮做執業醫生，佢諗都唔使諗就答「未考慮」喎。
依家佢出任香港社會醫學學院副會長，義務幫手招攬多啲醫生投入癌症、心臟病等專科行列，一樣咁開心。
講講吓，佢慨嘆自己已經喺職場打滾咗二十年，可能係中年危機，要停一停，諗一諗，「父母年紀大，呢二十年我都無乜點盡過努力去照顧佢哋……」提到最敏感的感情事，佢就面紅紅，尷尷尬尬咁話：「呢啲就唔好講喇。」
諗新穎方式幫母校籌錢
以前每有疫情爆發如禽流感、沙士、豬流感等，都會見到呢位「抗疫大將」出動。依家無官一身輕，被問到港府對西非伊波拉進行嘅抗疫工作有甚麼睇法，佢就好輕鬆咁答「做得幾好，我都好有信心，相信伊波拉好難好似沙士咁落地生根」。
講到要為母校籌款六千萬元搞小班教學，佢就直言母校對捐款需求都幾大，真係要諗啲新穎方式籌款，例如依家熱爆嘅淋冰桶挑戰。
