員工慨嘆不如狗 港鐵累狗又累人

呢嗱，港鐵尋日公布本年度中期業績，錄得超過七十九億元純利，按年上升近三成，真係肥過肥仔水。人哋就話發財立品，港鐵三日唔埋兩日出事，服務延誤多過食飯，市民畀你害少陣已經還得神落咯。

最離譜嘅係，港鐵唔單止靠害市民，連動物都難逃毒手，名副其實累人累物。唐狗遭直通車輾死事件，連日來鬧到滿城風雨，但其實呢單嘢完全可以避免嘅。正如有人質疑，工作人員落路軌將狗狗救起照計唔難，就算自己唔識救都可以call漁護署，港鐵咁簡單嘅嘢都唔做，令狗狗慘成輪下冤魂，唔怪得有市民幫佢改名做「未雪」喇。

成日話一滴水可以睇穿整個世界，其實一隻狗同樣可以睇穿港鐵混亂不堪嘅管理。事件發生後港鐵賴得就賴，開頭狡辯話搵唔到隻狗，畀網民踢爆曾有職員嘗試驅離後，又改口話職員曾嘗試抱走隻狗，實情只係遞張櫈畀狗狗自己跳上去就算。睇到呢度，大家係咪覺得情節熟口熟面呢，冇錯嘞，港鐵回應好似唧牙膏咁，前言不對後語，十足十高鐵工程延誤翻版呀。

仲有吖，港鐵高層呢頭話會調查事件，嗰頭又向公眾道歉，點知平息唔到民憤不特止，反而辣慶埋前線員工。有工會代表埋怨壓力山大，甚至有前線員工擔心身份被識穿後畀人圍，放工後即刻換制服，大嘆「人不如狗」。佢哋仲向管理層大反擊，話港鐵根本無就動物墮軌訂定指引添。你哋話嘞，一單動物意外事故，港鐵都可以搞出個大頭佛，市民嬲爆，員工灰爆，公司（火羅）爆，真係唔到你唔服。

老實講，港鐵唔單止累人累物，簡直係添煩添亂。尋日之嘛，有市民投訴幾名內地遊客喺東鐵車廂內公然開炸雞大餐，點知港鐵職員到場後冇開罰單，淨係用廣東話警告就走人，雞同鴨講咯喎，對方咪繼續大快朵頤囉。喂，家陣中港矛盾風頭火勢，港鐵應該一視同仁，加強執法至係o架，依家反而輕輕放過，好似慌死兩地民眾爭拗唔夠多咁，唔係添煩添亂又係乜呀！

話時話，港鐵啱啱送走前行政總裁韋達誠呢位洋和尚，佢嘅繼任人梁國權尋日實牙實齒承諾吸取教訓，改善服務喎。土和尚能唔能夠唸好經市民就唔知，市民淨係知港鐵再爆大鑊，到時梁國權莫講話淋冰水，成個人放入冰格雪藏都唔得掂呀，叮！