SUN搞作：打橫嚟講：執生食腦過後的香港
香港孤島，在一個被母親遺棄不理、屈身殖民處境之下，能創出奇迹，成為世界級國際大都會，全因此地的「香港仔」本事。一直以來，研究香港人性格的學者，俱認同香港人成功的要訣有二，就係「執生」和「食腦」。
「執生」，是戲班術語，指在舞台演出時，不能有一分鐘的停頓，亦無可能沒有半秒之失手，所以，臨場得須靈活應變處理突發事故，是謂「執生」也！
「食腦」，並非吃猴子腦來以形補形，而是「靠腦袋發達、腦筋機智」作取勝之道也！
現今的香港人，失去了九七前那一代的智慧，故每日發生的社會問題，唔止不見有人識得搞番掂，仲愈搞愈喎添！嗱！看着港鐵撞死唐狗一事，赫見家陣港人質素下降之恐怖。
港鐵事後回應的笨拙，來自被民情牽着鼻子走，不得不道歉。港鐵員工對高層的道歉不滿，其工會主席林少偉話，員工入職時無接受過處理動物嘅訓練，亦說事件未有調查結果前便道歉，對員工不公平喎！唉！公司拿拿臨say sorry，係將事件降溫，大事化小啫，傻仔！你仲趁此添煩添亂，係咪唔望公司好呢？還敢說「程序公義」？喂！有現場群眾投訴，見你班員工救狗無能而想幫手，卻畀你哋「前線員工」阻止喎！仲有，點解隻狗會喺你哋咁多人當值時，可以「入到閘」嘅？
記唔記得兩、三年前左右，有個婆仔在公園水池邊不小心將個頭浸咗落水池裏，有人見狀想拉起阿婆，都係畀現場「實Q」阻攔，要依足程序辦事，打九九九，等得救護車來，阿婆已魂歸天國！只要當時一手拉起阿婆便OK啦！仲講乜Q程序公義吖！同樣，「前線員工」揸碌棍落車軌「趕狗上路面」，咁叫做「營救」？
執生食腦的日子遠去，剩下一群推莊卸膊以程序為首的庸材自保，此乃今日之香港囉！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
