城中鏡：小廚神煮力出擊
仁愛堂日前舉辦「童心煮力為仁愛」小廚神烹飪比賽暨慈善晚宴，總理、嘉賓同一班小廚神合作下廚，個個煮得有板有眼。
陳嘉賢同老公馮建輝（左二及一）及小參賽者Kenny賽後與名廚陳國強（右一）合照。
劉海航夫婦（左及右）經常在周末品嘗囡囡Stella嘅廚藝。
高永文（右二）同肥媽（左二）合作炮製春乳和牛，香氣四溢。
當晚各位小廚神出盡法寶大顯身手，見參賽者Stella碟鹽香雞翼香噴噴令人垂涎三尺，主持人問佢要唔要落葱絲，佢就好快回答話唔需要，非常有主見。原來因為佢嘅總理爸爸劉海航好鍾意下廚，所以家中存放咗唔少調味料及食材，搞到佢對煮食都好有天分，經常與哥哥流連廚房。至於總理張嘉齊囡囡Stephanie就煮蝦膠炒蛋。
主動參與 積極拉票
另一邊廂，只有四歲嘅參賽者Kenny亦好搶鏡，同拍檔、德國寶（香港）副總裁Karen陳嘉賢製作愛心月餅，好應節喎！雖然Kenny年紀小小，但好主動爭取參與每項工序，評分時仲老老積積走去逐個拉票，問啲評判覺得好唔好食，被讚賞有領導才能。
至於食物及衞生局局長高永文夥拍肥媽Maria Cordero合作炮製嘅「春乳和牛」，腐乳香味傳遍四周，籌得超過八萬元善款。講到美食，高永文仲非常興奮，話啱啱去完蘇梅島旅行，在當地除咗玩獨木舟外，仲同太太喺公路旁發現咗個街市有隱世美食，包括上湯浸釀苦瓜同豬肉煮筍，令佢食指大動兼回味無窮喎！
