設計圖片及對白
按工聯會不成文規定，兩位立法會勞工界功能界別議員若要連任，就需要轉戰地區直選。佢哋一直有意培育身兼東區區議員嘅郭偉強出選港島區直選，接替老將「阿王」王國興嘅議席。不過，阿王最近戰意非常高漲，似乎未有意退位讓賢，所以郭偉強要轉戰港島區直選，就要睇超級議員陳婉嫻台戲點唱法嘞！
以嫻姐現時地位，基本上點選都贏，但究竟佢會選擇退定留，依家仍係未知之數。假如佢想退休，其超級議席好有可能由阿王頂上，屆時郭偉強先攞到「入場券」問鼎港島區議席。如果嫻姐想坐多一屆，咁阿王極有可能繼續留守港島區，到時郭偉強只能空降其他選區，贏面低之餘，分分鐘連個氣勢都無埋。
不過，就算嫻姐決定淡出，將機會留畀後生仔，亦唔一定畀郭偉強，因為工聯會內部都有好多後生仔，好似最近跑出嘅「工聯會吳啟華」嘅理事長吳秋北。其實喺工聯會服務咗咁耐，佢嘅知名度一直偏低，但自從佢擔任反佔中大聯盟發言人就人氣急升，雖然大聯盟爆出唔少負面新聞，但佢起碼贏咗人氣，對選舉有一定幫助。
工聯會中人想吳秋北落戶港島，一來因為佢「左味」唔濃，書生形象較易吸納中產票源，加上佢祖籍福建，如果由佢出選港島區，相信可吸納北角一帶福建幫票源。所以郭偉強首先要過嫻姐嗰關，仲要再撼贏吳秋北，先有機會出選港島區，否則佢嘅前途隨時好似會內幾位立會前勞工界代表一樣，做完一屆就拜拜。
第一手消息請下載on.cc東網
