政壇：日本出招培養年輕股民

非也，當局其實係想增加小朋友對股市嘅認識，為未來培養一班年輕但成熟嘅散戶。據悉，日本金融服務局打算明年一月前將十九歲或以下嘅公民納入日本個人儲蓄帳戶（NISA）計劃，如果佢哋投資股票或信託基金少過八十萬日圓（約六萬港元），賺到嘅股息同利潤都享有免稅優惠。

可以想像，正常情況會係父母幫小朋友開個投資戶口，再幫佢買賣，直至佢十九歲為止，考慮到現今嘅年輕父母恐怕無乜錢剩，阿爺阿嫲都可以幫佢開戶。換言之，計劃另一個目的係吸引更多散戶入市。

據日本央行統計，就算依家利率低到冇人有，日本人都係寧願擺舊錢喺銀行都唔投資，截至去年底，股票或基金佔日本家庭金融資產嘅比例得百分之十四，遠低過美國同歐洲分別百分之四十五同百分之二十四。

更令當局意外嘅係，目前NISA規定二十歲或以上人士可享五百萬日圓投資免稅額，但至今竟然得百分之三點二嘅戶口由二十至二十九歲人士所開，可見年輕一代幾乎冇人炒股，所以日本政府至唔放過呢批咁有潛力嘅國民。