楊偉雄同班IT界代表一齊接受冰桶挑戰。
全城熱爆嘅「冰桶挑戰」，尋日輪到香港電腦商會主動搵咗多個IT界代表，齊齊喺灣仔金紫荊廣場淋冰桶兼捐錢。除咗有理工大學行政副校長楊偉雄參與外，香港軟件行業協會會長楊全盛更係第二次參加活動。做善事之餘，又可以令港人對肌萎縮性脊髓側索硬化症（ALS）多一分認識，又何樂而不為？
楊偉雄
香港肌健協會會長劉偉明（左）話香港係一個充滿奇迹嘅地方。
香港肌健協會會長劉偉明尋日亦有觀戰，佢認為活動最大得益係佢哋呢班ALS病人。佢又話香港係一個充滿奇迹嘅地方，截至尋日上午，佢哋已經籌到近九百萬元。呢筆款項不但可以幫助協會重新規劃對ALS病人的服務，更改變了ALS三個字本來嘅意義，由一個鮮為人知嘅病症，變成現在香港人對ALS病患者關懷嘅象徵。
此外，香港醫學會尋日出新聞稿指淋冰水可能有危險，叫人唔好亂嚟。醫學會會長史泰祖話無意向呢項籌款活動潑冷水，但希望市民量力而為。
史泰祖個人認為呢項挑戰已經變咗質，原本係叫人捐錢，唔捐就用冰水淋自己，感受吓病人點慘法，但依家就變成對政敵挑戰的方式，失咗原本意義喎！
第一手消息請下載on.cc東網
