政壇：學民搞中學罷課難成事
全國人大常委會喺嚟緊嘅星期日就會議決本港政改框架，近日政壇吹風都係以悲觀為主，學聯就講到明，如果人大否決公民提名，佢哋九月中就會喺八大院校發動罷課，相信罷課如箭在弦。至於主要代表中學生嘅學民思潮，近日都開始放風，將會考慮跟隊，喺中學發動罷課，佢哋尋日仲同教協開會，商討罷課細節。不過，中學生唔返學，隨時被指曠課，中學又唔可以鼓吹未經家長同意嘅活動，唔知最終會唔會打得響呢？
設計圖片及對白
怕被人當係曠課
學民思潮召集人黃之鋒尋日喺社交網站話，目前有包括佢在內嘅四十名學民思潮大專成員，將會響應學聯罷課。學民思潮依家收集緊學生意見，考慮啟動中學罷課嘅可能性，例如人數、地點、內容。學民發言人周庭、Oscar黎汶洛同教協會長馮偉華、副會長黃克廉、立法會代表葉建源開會，商討中學罷課嘅可能性。
Oscar話佢哋現階段會先搵反國教科期間成立嘅校友關注組搵人罷課，但承認如果趁返學期間罷課，或者會被人話係曠課，所以有諗過好似反國教集會咁，放學先去大學或政總附近集會。另外，佢又認為好難返咗學又唔上堂，故此諗緊返學戴黑絲帶，當係沉默抗議喎。
佢話教協會全力支持大專生罷課，但中學就因為校方唔可以鼓吹未經家長同意嘅活動，所以只會支援。佢又話教協講到明，如果校方懲罰曠課學生比校規寫嘅更嚴重，就會有大型跟進行動，聽日就會同包括佔中在內等團體召開「六方會談」。
葉建源都話中學究竟係全校定個別同學罷課都有爭議，又要衡量同學有冇足夠成熟度，比起身為大人嘅大專生唔同。
