官衙狗咬狗骨 私隱笑話多多

件事係咁嘅，蔣任宏喺網誌爆料，私隱專員公署月初發表人對人直銷電話公眾意見調查結果，指當局監管不力，呼籲有關部門設立拒收呢類騷擾電話嘅登記冊，點知調查結果公布後，隨即收到商務及經濟發展局來信，對調查嘅準確同可靠程度表示質疑，又話局方冇責任跟進相關建議喎。商經局咁高調反擊，直頭當私隱署冇到，唔怪得蔣任宏感到好「驚訝」喇。

最好笑嘅係，商經局仲不滿調查結果公布前一日至收到副本，好似好冇面咁。而蔣任宏就話喎，署方「做法合適」，又話公署運作獨立於政府架構添，擺明唔妥商經局。嗱，一個係港府政策局，一個係法定機構，居然好似針尖對麥芒，互不相讓，互相指摘，講好聽啲叫窩裏鬥，講難聽啲根本就係狗咬狗骨。細路仔都睇得出，佢哋無非想互相卸責啫，你話係咪好笑吖！

即係咁，直銷電話擾民不斷，港府闊佬懶理，變相縱容，私隱署的確冇鬧錯商經局o架。呢，調查發現，超過九成受訪市民曾接過直銷電話，當中九成九人指呢類電話對自己構成滋擾。係人都知，隨着手機愈來愈普及，廣告式促銷電話困擾市民問題亦愈來愈離譜，當局○七年起實施《非應邀電子訊息條例》，市民可以透過登記電話號碼，拒收傳真、短訊及預錄電話推銷等，點知當局做啲唔做啲，法例甩漏多多，拒絕將人對人直銷電話納入規管範圍，卒之咪搞到七國咁亂，天怒人怨囉。有人話，直銷電話擾民，港府係幫兇，真係一啲冇講錯。

不過咁，來說是非者，便是是非人。私隱專員喺網誌狂插商經局，成個「私隱衞士」咁款，查實該署咪一樣保護私隱不力，兩個機構一擔擔，不過係五十步笑一百步咋。

呢嗱，近年跨境騙案愈來愈多，內地網站公開兜售港人個人資料，私隱署竟然話對境外機構無管轄權，側側膊推卸責任，連通知內地部門堵塞漏洞都懶得做。市民私隱毫無保障，私隱署關人個關不特止，仲周不時被揭發高層濫用公帑，損公自肥等等，簡直醜聞不絕，旨意佢哋保護市民私隱，蚊都瞓蛇都死喇。

無論點都好，直銷電話滋擾市民，不容當局繼續卸膞，唔該私隱署同商經局四四六六拆掂佢，唔好再狗咬狗骨，否則，盞自暴其醜嘅咋，叮！