SUN搞作：打橫嚟講：做乜紀念鄧小平冥壽？
今天，是已故中共前領導人鄧小平之冥誕一百一十周年正日，全中國境內舉國高調大搞紀念活動，除民間各省各村同鄉會理事長派錢畀蛇頭吹雞搵老臨着制服到鄧老銅像前叩頭拜祭外，官方亦大事出版《鄧小平文集》和《鄧小平傳》歌功頌德，其紀念規格之高，比任何一次紀念毛澤東的還要高！吖！講漏咗，喺大陸全國，現正播緊一套神劇，叫做《歷史轉折中的鄧小平》，嘩！全劇內容精粹，講到老鄧仲勁過基斯杜化李夫之「超人」，除咗唔識飛之外，若唔係佢，中國就無今日之強勢也！
有人說，中國是本難明的書。
當然唔係啦！只要有香港小學三年級常識和智商者，唔使睇，佢一趷起條尾，就知發生乜嘢事啦！中共至今仍堅守「任何文藝創作必為政治服務」的黨規，加上「有關任何一個領導人（不論生與死）的出版和創作」，必須獲國家批准，方能發布，這不是版權問題，而係政治需要。
好端端，做乜鬼在此時刻搬個皇上皇神主牌出嚟？
早前，中共總書記習近平大舉反貪腐，近日又有「學『習』運動」，建立個人權威，皆因佢條路比江澤民和胡錦濤都難行。前有豺狼，後有猛虎，佢唔果斷，點企得住腳，仲未計佢想「改革」國家、推行新政。
家陣大陸一切叫人O嘴的政治決定，都是以「國家安全」為首位，所以，香港政改只是芝麻綠豆事，一唔聽話，同我「收歸國有」，免生事端，不受控制，當老鄧仲要出來壓陣時，即係仲有權力挑戰囉！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
