城中鏡：話美麗由心而發 名媛為沒女平反

寄語翻身要增值

香港青年聯會（青聯）日前舉辦分享講座，為咗力撐身為青聯主席嘅兒子霍啟剛，朱玲玲親自出任嘉賓分享個人經歷同美麗心得，吸引近百位青年才俊、尤其是年輕女會員報名出席。朱玲玲話「沒女」想大翻身，自我增值好重要，又話美麗係由心而發，要時刻保持正面思想，懂得欣賞同享受生命，就自然會靚嘞！

朱玲玲又提到要好好享受生活中每個角色，指自己時而擔當母親，時而係善團領袖，但無論擔當乜嘢角色，都係學習嘅好機會喎。佢仲透露，同三個囝囝平日相處融洽，無所不談，秘訣係靈活變通，因應對方唔同性格施以不同教法，又教導兒子從小學會獨立，唔可以恃寵生嬌。

青聯常務副秘書長羅詠詩亦有捧場，佢話都有留意「沒女」節目，認為女性應該要對自己有多啲信心，唔需要太在意人哋嘅睇法，最緊要係充實自己，不時主動學習自我增值。佢仲畀咗少少貼士一啲已經有內在美但唔夠自信嘅女士，話只要配合少許化妝，加上充足睡眠，儀容就可以更大方得體。