政壇：搞搞政：舊人唔選 九東爆空降戰

建仔嘅「橄欖」陳鑑林做咗立會議員十幾年，有傳佢下屆會退下火線，畀新人上位。據聞該黨已嚴格篩選緊合適嘅接班人，最有機會跑出嘅係已歷任四屆觀塘區議員嘅柯創盛，同埋身兼香港中小型律師行協會會長嘅黃大仙區議員陳曼琪。兩人一個地區經驗豐富，一個係專業人士，邊個可以上位暫時都係未知之數。

至於喺今屆成功由功能界別轉戰直選嘅謝偉俊就傳會再轉戰場，挑戰超級區議會議席。佢最有可能喺明年參選區議會，接替係灣仔區議員嘅「白姐姐」白韻琹，為參選超級區議會做好準備。如果謝偉俊真有此意，屆時九龍東就會空出一席，相信各陣營都會虎視眈眈。

白鴿黨依家喺九龍東行基層路線，公文袋就主打中產區，但就未有走激進路線嘅人。聞說九龍西直選議員黃毓民會同愛將、一二年參選九龍東嘅黃洋達互調選區，以毓民嘅知名度要「空降」九龍東贏取議席並唔出奇，但如果屆時又殺出個社民連陶君行，泛民就會陷入四方混戰局面，建制派分分鐘可坐享漁人之利，毓民就回應話，佢空降九龍東嘅講法係無中生有。

盛傳連續做咗三屆議員嘅公文袋「袋巾傑」梁家傑將會放棄連任，全力支持黨內飛機師譚文豪。譚文豪喺一二年立會選舉已經拍住袋巾傑出選九龍東，但當時排第二未能進身立會，下屆選舉兩人可能掉番轉，由袋巾傑幫佢抬轎都唔定喎。