政壇：肥張戴古董墨鏡唔老土

話說立法會議員「肥仔張」張宇人尋日戴咗副名牌太陽眼鏡去深圳出席政改座談會，但就被部分男議員評頭品足，女議員Ann蔣麗芸仲笑佢副太陽眼鏡個款式好舊，係「古董」眼鏡。肥仔張不但冇嬲阿Ann，仲直認不諱話真係「古董」嚟o架。原來肥仔張喺一九八四年用一千七百元購入呢副Cartier（卡地亞）太陽眼鏡，足足有三十年歷史。佢仲自爆呢副眼鏡原本係近視眼鏡，但後來有老花，又唔想嘥咗副眼鏡，先攞去眼鏡舖改裝做太陽眼鏡。真係夠晒環保。