政壇：鄉局組黨研究冇下文

講起呢個研究中心，要追溯番半年前鄉議局話組黨一事，皆因成件事先由主席劉皇發發起嘅，佢當時接受傳媒訪問，就透露局方討論過組黨嘅事，之後就由該局副主席林偉強將呢個話題發揚光大，又話佢哋組黨嘅話，黨員就唔應該有雙重黨籍，又話結盟始終係寄人籬下，組黨先夠直接，總之就講到似層層咁。

早前仲登廣告請人

鄉議局之後仲就此撥款一百萬元去成立研究中心添，話用嚟做前期工作，包括聘請研究員同購買器材。半年過去喇，研究中心做咗啲乜嘢研究工作呢？佢哋嘅前路又係點呢？

據聞依家研究中心仍然由發叔嘅妹夫、鄉議局執委薛浩然打骰，有傳佢淨係擔任呢個研究中心主任職位，就每月領取薪酬七萬多元。此外，中心早前又喺招聘網站刊登廣告，話要請研究員或助理喎。

雖然我哋唔太清楚呢啲研究員同助理嘅月薪究竟有幾多錢，但按照廣告上列明嘅要求，包括要調查員有碩士或博士學位等嚟睇，人工一定唔會太低啦。研究中心仝人都有唔錯嘅薪水，查實又做咗啲乜嘢研究呢？

有鄉紳就話，真係唔知佢哋做緊乜；又有鄉紳話，可能係乜都冇做過。其實究竟鄉議局研究中心係神神秘秘做緊研究工作，又或未放棄搞組黨，抑或真係乜都冇做呢？如果有努力做研究嘅話，真係要向班鄉紳匯報吓啲工作，免得大家有任何誤會啦！