向來優雅端莊嘅基本法委員會副主任梁愛詩，好多時穿中式旗袍款式套裝，兩邊頭髮用髮夾夾實，髮尾鬈曲。不過，前日喺中環太子大廈一間銀器專門店，就赫然發現正在店內購物嘅詩姐以新Look示人，除咗執到四正外，最注目係電咗個又高又鬆嘅新髮型，而且仲電得好鬈添，似足女版愛因斯坦。

梁愛詩等取貨四圍逛期間，赫然發現佢個新髮型似足女版愛因斯坦。

梁愛詩在太子大廈一間銀器專門店領取貨品，店員隨即為其包裝。

店員開門送梁愛詩離開。

其實大前晚先至喺一個慈善基金會晚宴遇到詩姐，當時佢仲係以舊髮型示人，估唔到一晚之間就大變身。詩姐話好鍾意去太子大廈嗰間店舖買銀器，除咗佢鍾意銀器外，亦因為其寫字樓以前在太子大廈附近，有時在附近超級市場買食物畀媽媽，有時又會買禮物畀姪仔同姪女。不過，詩姐話由於寫字樓租金愈來愈貴，所以最近就搬咗去金鐘喇！

鍾情銀器 極速掃貨

雖然詩姐搬咗寫字樓去金鐘，但前日下晝三點鐘又咁啱撞到佢去番太子大廈買銀器。佢步入專門店後，店員就好似見到熟客咁，自動介紹啲新貨品畀佢，又攞出詩姐預訂嘅貨品，佢檢查吓啲貨品後就隨即畀錢嘞。當店員包裝貨品期間，佢就周圍望吓，又同店員傾偈，顯得非常熟絡，最後店員仲送佢離開，成個購物過程不足十分鐘。

詩姐離開時見到記者，即展露微笑，唔知係咪好滿意件貨品呢？其實過去幾年，不時都見到詩姐去幫襯呢間銀器專門店，又去過另一間名牌首飾店買銀耳環，睇嚟佢對銀器真係情有獨鍾喎！

第一手消息請下載on.cc東網iPhone/iPad/Android/Windows Phone Apps