SUN搞作：打橫嚟講：溫和中間騎牆派獻醜嘞！

「政治，只是一個跟紅頂白，看風使的dirty joke。」我話的！

早前，在此欄，寫「政治仲污糟過女人私處，只啱有癖好如張融之流的粉皮去舐」，即時，有「女讀者」（嗱，括住個「女」字，唔知又會否引來「性別歧視」的批評？）留言話「女人私處是很神聖的！」哦！咁！我改囉：「政治仲神聖過女人私處，只啱……張融去舐」，得未？

說政治污穢過女人私處，只是一個比喻，有理解力的讀者，係concern文本背後的論述，多過文字表面的意象，一般平民大眾視點不高，憑直覺論事，誤讀內容，是很正常的！但香港政圈內，有班學歷高的「社會精英」，卻做出啲弱能事，真笑爆嘴！

有三十九件自詡「溫和中間派」的極品，手牽手大合照聯署，呼籲香港各陣營「停火」，「平心靜氣」商討政改方案喎！吓！八月底就係佢哋阿爺頒布「香港政改執行令」啦！依家仲玩手牽手，叫大家坐低慢慢傾，當香港人係白癡o架咩？

聯署的極品裏，有左毒上腦的全國人大代表，亦有全國政協常委和禮義廉及工聯會的頭目，誰說呢幾隻粉皮係「溫和中立」的呢？吓！有民主黨黨員喎！哦！羅致光呀！佢亦曾話過會「佔中」的呀！信佢邊次先？名單中，見港大法律學者張達明與人大代表劉佩瓊手牽手，真想嘔！世上，仲點可能有人低智到咁田地吖？

中共已全面控制了「政改」事務，玩「溫和中間」大龍鳳，只是一場「交心」戲，畀啲傻仔獻世而已！

全球政治生態，確實存有中間溫和派的，但唯獨專權獨裁的共產世界不能存在，只可有「騎牆派」，讓佢哋得少許甜頭，唔使吩咐，佢哋都會做出出賣靈魂的「溫和好事」o架嘞！是嗎？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府