政壇：梁繼昌抖暑練水拒「優悠」
立法會議員每逢暑假，都會四出遊山玩水歎世界，但會計界Kenneth梁繼昌就唔似其他議員咁周圍玩，尋日仲好勤力咁練水添！原來係為咗備戰十月舉行嘅維港渡海泳。
包括梁繼昌（左起）、胡志偉、馬逢國同吳亮星等多名議員舊年一齊參加渡海泳。（資料圖片）
梁繼昌開始練水，希望升呢參加渡海泳嘅比賽組。（資料圖片）
Kenneth舊年同幾個同僚都有參加過渡海泳，加上現時仲有兩個月先比賽，使唔使咁勤力呀？原來佢係為咗升呢，唔想再好似去年咁參加屬小兒科嘅「優悠組」。
叫得做「優悠組」，確實相當優悠，總之肯游就得，亦不設時限，但就要參賽者着住救生衣游水。Kenneth話咁實在太肉酸，頂唔順自己要着住件救生衣游水，好似小朋友玩泥沙咁，所以打算升呢參加「比賽組」。所以佢尋日趁住好天，立即跳咗落水游番兩公里，但佢話尋日只算係熱身，所以都係hea游，要用四十分鐘先完成兩公里，都算相當「優悠」o架！
