鍾國斌不滿學生喺提名委員會刪去佢所屬嘅紡織及製衣業界功能界別議席。
多名立法會議員尋日出席第七屆模擬立法會閉幕禮，點評學生撰寫嘅政改方案同模擬法案。有「立法會方中信」之稱嘅紡織及製衣業界議員Felix鍾國斌，不滿學生喺提名委員會刪去佢所屬嘅功能界別議席，公文袋議員「袋巾傑」梁家傑於是打蛇隨棍上，叫Felix改去直選。如果叫得Felix直選，咁點解公文袋又戀棧法律界功能界別嘅議席呢？
「怪醫」質疑政府議案非常兒戲
唔少議員不滿政府年年都喺最後一刻先向立法會提交草案，搞到佢哋成日都要開快車。不過，醫學界「怪醫」梁家騮就質疑政府嘅議案非常兒戲，加上議員並唔係所有政策範疇都識，有時全靠秘書處幫手，先至可以將啲政府議案執到四四正正。
有議員被指為用盡每年酬酢開支，不惜亂開「白頭單」申領津貼。會計界梁繼昌強調，佢每次代表立法會去應酬都會問餐廳攞番張單，每個月使幾多就申報幾多，但就覺得如果要統一議員申領酬酢開支準則，只會加重秘書處工作量喎！
第一手消息請下載on.cc東網
