政壇：張宇人焗做兩委會主席
大家都見到立法會財務委員會主席「星爺」吳亮星，早前處理新界東北規劃前期撥款搞到一鑊泡。根據建制派協調名單「梅花間竹」嘅慣例，下個立法年度就輪到富貴黨飲食界議員「肥仔張」張宇人擔正。睇番肥仔張首年處理較為爭議性大嘅長者生活津貼撥款，最後都順利過關，算係鎮得住個場，但該黨立場飄忽，當遇上泛民主派「拉布」時，唔知佢點樣處理呢？會唔會幫手拉埋一份呢？
設計圖片及對白
睇吓係咪心有餘而力不足
有心人就話，富貴黨一向喺支持同反對政府之間游走，好似黨魁田北俊之前就試過喺審議「三堆一爐」時提出中止待續動議，嚟緊十月新一個立法年度開波之後，社民連同人民力量「拉布三子」就「三堆一爐」、創新及科技局開位撥款等爭議項目發動「拉布」時，最終富貴黨點樣企位？做主席嘅肥仔張又會唔會配合個黨呢？
另外，原來根據協調名單，肥仔張仲要做埋食物安全及環境衞生事務委員會主席，尤其財委會復會要處理「三堆一爐」、創新及科技局開位撥款等爭議項目，同埋食物安全及環境衞生事務委員會亦要處理好多基層議題，咁多火頭兼箭頭飛埋嚟，同一時間做兩個委員會主席，唔知肥仔張會面面俱圓，定係顧此失彼呢？
肥仔張就話會盡力而為，但因為自己未試過同一時間做兩個委員會主席，好難講搞唔搞得掂，「睇吓我到時兼唔兼顧到，係咪心有餘而力不足」。佢透露，本來想做首兩個立法年度嘅財委會主席，但星爺話要做第二年度主席，所以佢依家要一次過做兩個委員會主席，睇嚟肥仔張都係呻笨，對星爺決定唔多滿意喇！
不過，佢對於新一屆財委會情況就唔多樂觀，認為就算唔做食物安全及環境衞生事務委員會主席，財委會都係天翻地覆。相反食安議題係佢本業，我哋問起近期麥當勞買過期肉事件，就話比起禽流感、收雞牌等，就非常之輕擎，唔覺得係大件事。
