近排唔少半新股陸續爆煲，所以監管機構都「金睛火眼」咁（目及）實佢哋，搞到好似「Bra股」都市麗人驚青到乜都唔敢講，令到成個記招冇料到；不過，「洋參大王」、恒發洋參主席楊永仁就無驚過，尋日開記招兼且同傳媒一齊食飯，一樣可以「口水多過浪花」！

楊永仁（中）開記招乜都敢講，夠晒精彩。

洋參大王楊生一開波就話，今年正值公司成立三十周年，「人生有幾多個三十年？」所以佢建議派特別息回饋股東，雖然佢無講到派幾多，但強調「總之係好多！」之後又力sell旗下人參副產品，好似最近賣緊的花旗參月餅、由野山花旗參釀製嘅白酒，同埋即將推出的一系列即食保健品同面膜。言談間仲透露咗啲銷售價錢，搞到負責公關完場個陣同記者講唔好寫敏感資料，之後仲親自打電話解畫添！咁又係嘅，今年到依家先後已有兩隻半新股綠色動力同埋依波路，上市唔夠一個月，就連隨發盈警啦！

可能就因為咁，搞到另一邊廂，都市麗人個場就悶爆喇，大家問到任何數字或者預期嘅時候，管理層都話因為公告冇披露唔講得，只係講來講去三幅屁，所以辣咗唔少記者，個場面都幾尷尬，管理層就即刻打圓場話，由於啱啱上市第一次做業績會唔太識，希望之後做好啲喎！

第一手消息請下載on.cc東網iPhone/iPad/Android/Windows Phone Apps