城中鏡：許家印夥馬雲搞乳業？
恒大業務唔單止全國化，仲愈來愈全面，有內地媒體報道就引述知情人士話，恒大老闆許家印早幾日搭乘私人飛機飛去內蒙古考察，聽講話可能係去考察乳業，咁啱得咁蹺，早排加入同恒大合作搞足球隊嘅阿里巴巴主席馬雲喺七月頭亦投資牧場養奶牛。
繼足球隊後，許家印（左）會唔會再同馬雲（右）合作搞乳業呢？（資料圖片）
聽恒大老友話，恒大已經有個健康產業事業部，今次許家印帶住班集團高層去內蒙古考察現代農業、畜牧業，之後仲會去黑龍江考察新項目，但係就無話恒大係唔係會進軍乳業。不過報道入面嘅知情人士講，恒大之前已經成立專門小組到內地其他地方考察奶源基地，睇嚟進軍乳業嘅可能性好大，據了解，內蒙古自治區黨委書記王君喺星期二就會見咗許家印一行人，就進一步加強合作、實現共贏交換意見。
其實都唔出奇，恒大搞其他產業已經見慣見熟，事實上，近年除咗發展地產之外，足球、電影、礦泉水呢幾樣業務都快速發展。恒大喺今個月初舉行上半年工作會議嗰時就提到，要喺下年之前確保進入世界五百強，而且仲第一次提出恒大要多元化發展嘅戰略，唔知下次恒大仲會再有乜嘢新搞作呢?
