SUN搞作：打橫嚟講：廿萬月薪庸官禍港實錄

直銷電話叫人煩厭，上屆煲呔政府口說打擊，實則放生，只禁制「錄音推銷」，卻不限「真人打電話」的「人對人促銷」，那便造成家吓全港「機民」飽受騷擾的局面囉！

呢啲以電話滋擾作推銷的討厭手法，點會得到「被騷擾的受害者」嘅幫襯吖！我接到呢類電話，一定用足三十八個粗口語xyz打電話來的「無辜推銷員」。說佢「無辜」，此乃「佢都係搵食o架啫！」但咁做係等佢知道佢咁做係好乞人憎的，令佢快啲辭工唔做，不再繼續騷擾我哋「更無辜」的受害者！

嗱！個人資料私隱專員公署的調查，都話此類直銷電話係九十九個巴仙不受歡迎，幾乎無人會幫襯的！咁都算嘞！但最得人驚的，係打電話嚟嘅，可以噏得出「接電話的人」個全名，即中間有人「販賣私隱資料」啦！

可恨，警方接獲投訴後，至今，從沒有一樁成功入罪，變相「高度鼓勵」作案者無憂地繼續違法。

咁都未最離譜，更離譜的係香港廢柴政府養咗件超級垃圾，嗰件商經局粉皮卡片蘇，佢話市民要求修例拒收真人直銷電話這議題，「政府係持開放態度」，即係點呀？

佢仲話「要考慮呢行涉及嘅兩萬個職位」喎！即係因多人做緊啲騷擾他人嘅劣行，「被滋擾」嘅人就任由騷擾？呢啲係乜嘢邏輯？如呢度多賊，咁啲差人大可唔使執法？你返大陸做官啦！垃圾庸才！

我成日都指出，香港有今時今日的趴街，正因為有卡片蘇此類庸官，依家，又多一項事實證據，死未？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府