各個政黨已部署下屆區議會選舉，由立法會議員范國威領導嘅新民主同盟，有意衝出新界東走入新界西係政界嘅公開秘密，之不過聽聞新同盟喺泛民區選協調機制嘅基礎外，瘋狂喺荃灣區內屬於其他泛民黨派嘅勢力範圍「插旗」，無論係白鴿黨、公文袋同工黨等都無一幸免，玩殘晒其他黨派嘅部署，泛民「鬼打鬼」再度升溫，更多明爭暗鬥一觸即發！

設計圖片及對白

據聞新同盟有意進一步開拓新西，首先邀請環保觸覺譚凱邦加盟，之後睇準荃灣區議會綠楊選區議員林發耿早前捲入桃色醜聞，心思思諗住派出年輕女將喺區內大打「溫情牌」，撼低林發耿呢個地頭蟲。

激到白鴿黨紮紮跳

但同一時間，據聞泛民兩大政黨白鴿黨同公文袋，一早傾好想派上屆敗走愉景選區嘅白鴿黨王銳德「過檔」出戰綠楊選區，至於愉景選區就由工黨地區人士趙恩來頂上挑戰「雙料議員」田北辰，當時已有預言如果新同盟嘅布局成真，王銳德可能成為犧牲品無位「落腳」。聞說新同盟以白鴿黨唔派人參選象石同石圍角兩個選區為由，一度連「空降」人選都諗定，即時激到唔少白鴿黨中人紮紮跳，有傳新同盟呢個「插旗」安排係譚凱邦嘅主意，旨在增加區內知名度同培養地區樁腳，為一六年可能出戰新西做好準備。范國威接受查詢時承認新同盟有意派人出戰，唔評論有傳譚凱邦「插旗」安排喎！

第一手消息請下載on.cc東網iPhone/iPad/Android/Windows Phone Apps