政壇：建制派拉伕上街反佔中
由西環催生嘅「保普選反佔中」大聯盟，將喺本月十七日舉辦反佔中大遊行，但遊行未搞，已有多個參與團體被爆涉嫌派錢利誘市民上街，而且金額仲升得快過恒生指數，由最初嘅每人二百蚊，升至最近每人四、五舊水。我哋收到可靠消息，話西環下令今次遊行最少要有二十五萬人參加，又威逼各個建制派團體交人湊數，部分團體交唔到數，惟有使出派錢等那渣招。今次反佔中運動醜態百出，政治效果適得其反，西環高層係始作俑者，絕對難辭其咎。
二十五萬呢條數可以點砌出嚟呢？據聞西環下令會員最多嘅兩大建制派政團民建聯同工聯會，當日要各交十萬人上街。其他較大嘅社團、同鄉會同商會，都要各交五百人。較細嘅青年團體、街坊會等就各交三百人。有部分細團體埋怨，佢哋成個會本身都冇三百名會員，何來有三百人上街？惟有連老婆仔女、姨媽姑姐都搵埋。
即使係大團體亦申訴，佢哋會員係多，但好多都身兼多個不同建制組織嘅成員，大家互相派錢搶人，自然愈搶愈貴，唔排除有人就會賺到盡收足幾家茶禮，同時代表幾個團體上街。為咗安撫有關不滿情緒，據聞西環幾位高層由尋日開始，會晚晚設宴答謝有關團體嘅領導，違背晒中央嘅反揮霍指示，非常可笑。
