政壇：譚姜美珠呻老公易被呃
時下各種騙局手法層出不窮，一唔小心容乜易就墮入圈套。博愛醫院副主席譚姜美珠就呻話，佢老公譚立仁好易信人，成日畀人呃。多年前，有個人喺緬甸寫信畀佢哋，自稱係譚生表妹，叫佢哋幫手買張由緬甸去澳洲嘅機票。結果譚生心地好，唔諗咁多就用咗萬幾蚊幫呢位素未謀面嘅表妹買機票。估唔到十幾年後，證實此人係真表妹，總算冇再被人搵笨。
譚立仁（右）心地好，譚姜美珠（左）成日驚佢被人呃。
譚太憶述話，老公真係曾經有個阿姨去咗緬甸，但一直冇聯絡，突然殺出個表妹，連名都未聽過，實在好難確認真假。但信中人聲稱丈夫喺澳洲搵到分工，但喺緬甸買唔到機票過去，惟有請佢哋幫忙。譚太話，當年緬甸去澳洲冇直航，佢哋要大費周章購買由緬甸去泰國、再轉新加坡、香港同澳洲等多張機票，合共超過一萬元。雖然佢反對，但譚生話只要幫到人，唔理係唔係親戚都照幫咁話。結果十多年後，佢哋終於有機會同表妹相認，表妹仲帶埋家族四十幾人一齊食飯團聚添！
