政府部門繁多，普通市民搞錯某啲部門嘅職責或名稱都好正常，但如果係專責統籌不同部門嘅高官都搞錯，咁就真係抵打。荃灣民政事務處上月底以荃灣民政事務專員葉錦菁名義，發信畀區內嘅業主立案法團、互委會同物業管理公司等，仲將副本送晒畀一眾荃灣區議員，預告政府跨部門工作小組鐵定於下周四（本月十四日），清理當區嘅違例停泊單車，到時食環署會將所有違規單車嘅鎖鏈剪去，然後送到荃灣葵青地政處指定嘅扣押中心。

不過，封信居然將食環署嘅全名「食物環境衞生署」，寫錯咗做「食物環保署」，認真失禮。雖然估計今次手民之誤係出自荃灣民政處內嘅中低級職員，但葉專員冇睇清楚就批准下屬以自己名義發信，同樣需要負責！

第一手消息請下載on.cc東網iPhone/iPad/Android/Windows Phone Apps