政壇：郭琳廣諗計洗底
由於資深大律師「翟少」翟紹唐早前夠鐘卸任獨立監察警方處理投訴委員會（監警會）主席，政府隨即委任執業律師郭琳廣接任，之不過郭琳廣一上任櫈都未坐暖就備受質疑，據聞郭琳廣都自知輸喺起跑線上，上任後積極諗計改善形象，希望喺最短時間內取得各方嘅支持同信任。不過同一時間，部分監警會委員近來疑似唔聽主席支笛，對監警議題各自表述，再係咁搞法，監警會會唔會淪為一盤散沙？
設計圖片及對白
勤約委員飯局取經
對於郭琳廣嘅質疑主要涉及兩方面，一方面針對佢做過廣西省政協委員，擔心佢「染紅」監警會；另一方面針對佢打破咗由資深大律師做主席嘅慣例。據聞郭琳廣自知「唔熟書」兼輸喺起跑線上，所以上任後不時邀約個別委員飯局「取經」，言談間仲透露過自知形象唔及翟少正面、討好，希望委員過兩招畀佢將勤補拙。
咁又難怪嘅，翟少一向畀人感覺較為公平公正，而且左右兼聽，喺會內造就真正嘅「香港營」。就算翟少已經卸任咗幾個月，委員間仲不時搞聚會聯誼，相當難得。不過，郭琳廣接任主席都只係兩個月左右嘅事，要大家一時接受新主席作風唔容易，怪就怪佢「生不逢時」，偏偏喺警民關係陷入低谷時做翟少繼任人喇！
講開監警會，委員過去觀察七一遊行都係掛住個證以資識別，之不過由舊年開始改着印有監警會嘜頭嘅白色T恤，據聞呢個轉變係同副主席林大輝曾因觀察遊行而畀西環誤會有關。大輝接受查證時只係大笑幾聲並冇正面回應，但承認有份建議改着T恤，因為純粹只係掛證好難清楚區分自己，警員、示威者要行到好埋先知佢哋監警會委員嘅身份喎。
