城中鏡：「元秋邨」開檔 蔣麗芸被叫細路囡
外號「元秋」嘅立法會議員蔣麗芸（Ann）近日殺入長沙灣元州邨開設議員辦事處，尋日正式開幕。有熟悉地區人士就覺得元州邨英文名「Un Chau」嘅諧音同阿Ann個花名「元秋」好似，仲話唔通阿Ann想將元州邨變做「元秋邨」﹖阿Ann就話，唔講佢都唔覺，自言由細到大都同元州邨好有緣喎。
蔣麗芸在長沙灣元州邨開設議員辦事處。
阿Ann話，細個時佢爸爸蔣震都係喺元州街開廠，佢就經常在工廠一帶活躍，成日周圍買嘢食，最鍾意係買一毫子嘅碗仔翅，仲有魚肉燒賣同魚蛋等，就連佢嘅女助理都係出身於元州邨喎。話說尋日辦事處開幕都有唔少街坊捧場，其中一個九十三歲嘅伯伯就走埋去同阿Ann講︰「由細路囡睇到你大，依家仲同細路囡一樣。」阿Ann即時笑到見牙唔見眼。
不過，阿Ann冇邀請傳媒採訪尋日開幕，唔通佢怕被人踩場要低調行事？原來因為佢喺深水埗同九龍城已各有五個辦事處、油尖旺區又有兩個，今年仲會開多兩個添，所以費事次次開幕都勞師動眾咁話。
