城中鏡：「樓王」張建宗投資靠老婆
港股近日連創新高，金銀業貿易場慈善基金尋日舉行一連串慈善活動嘅啟動禮，有「樓王」之稱嘅勞工及福利局局長張建宗都有到場，我哋梗係要問吓佢嘅投資心得啦！點知佢竟然話，唔可以話佢好鍾意投資物業，事關除咗中西區個自住單位外，其他物業都係由太太名下持有，三言兩語之間，就將投資問題推晒畀太太，只係肯講自己長期睇好香港投資前景。
張建宗話投資都係太太話晒事。
東華三院將係一連串慈善活動嘅受惠機構之一，總理區宇凡（右起）、馮少雲、蔡榮星齊齊出席啟動禮。
張德熙（右）帶埋太太伍翠瑤一齊出席啟動禮。
破例申報埋太太物業
雖然張建宗話所有物業都係太太名下持有，但講到尾，一個家庭主婦要投資咁多物業都要有丈夫嘅支持，但佢就唔肯回應呢個問題。講到資產一事，政府並無要求官員披露配偶嘅資產，但張建宗就透露，佢申報埋太太持有嘅物業，咁樣可以提高透明度。咁除咗物業仲有冇其他證券等投資？咁多年來又係咪只買入唔賣出所持有物業等問題，一概問題，張建宗都話全部係由太太揸主意喇，仲自謙佢同太太只係小業主嚟喎！
講番個啟動禮，張建宗致辭時又講笑話，佢同另一嘉賓教育局局長吳克儉（吳得掂），一個係金一個係銀，即係兩個都咁重要。又笑笑口話吳得掂好有錢，因為政府如果每日使一百元，有二十一元係畀咗吳得掂，十八個半畀佢，十七元係畀食物及衞生局局長高永文，意思指政府重視民生，使超過一半錢喺教育、勞福及醫療上。
至於作為主人家嘅金銀業貿易場慈善基金主席張德熙，就睇好未來第三、四季證券市場會繼續造好，佢話受美股及當地房地產帶動，令港股亦向好，預計恒指今年有望去到二萬七千點水平。
