立法會財務委員會主席吳亮星（星爺）成為今年立法會嘅惹火人物，以新界東北新發展區前期撥款「一戰成名」嘅佢，尋日拉埋財委會副主席劉慧卿召開年結記者會。問到佢自我評分，星爺自信爆棚咁話：「有六十至八十分！」仲話，佢由始至終都係憑良心做事，絕對「無怨無悔」，冇理由「人哋話你兩句就唔做，好似小朋友咁」喎！

設計圖片

卿姐：架係自己丟

不過，星爺粗暴通過新界東北撥款呢筆帳，包括卿姐在內嘅泛民主派一直記到實，二人喺記者會重逢可謂火花四濺。星爺批評，泛民攞佢申報啲嘢嚟話佢做主席有利益衝突，形容泛民下下提不信任動議係「無事生非」。佢撩交嗌，坐喺隔籬嘅卿姐好難唔動氣，隨即反駁話泛民提不信任動議係有理據嘅，叫星爺要先反省，仲當面斥星爺「面係人哋畀、架係自己丟」，事件令財委會面目無光，星爺作為主席就唔應該猛同議員駁嘴，亦不應推測議員嘅發言動機，應該忍讓吓囉！

卿姐仲「提醒」星爺，若果再遇到議員「挑機」，大可退落嚟搵其他人頂替主席一職，或交由委員會投票決定。最後記者會未正式完結，二人勉強合照後隨即一個向左走、一個向右走，一拍兩散。

第一手消息請下載on.cc東網iPhone/iPad/Android/Windows Phone Apps