政壇：鄭泳舜遠赴澳洲跑「全馬」
深水埗區議員鄭泳舜（Vincent）迷上長跑兩年，都參加過唔少馬拉松比賽。佢最近仲跑出香港，遠赴澳洲參加當地嘅馬拉松比賽添。Vincent七月初就參加咗喺澳洲黃金海岸舉行嘅馬拉松比賽，今年初參加香港渣打馬拉松嘅時候抽筋，都含淚忍痛跑畢全程嘅佢，今次就再度挑戰全程四十二公里嘅「全馬」，仲喺三小時四十四分就完成，係佢自己最好嘅成績咁話。
鄭泳舜黑咗又瘦咗，原來係因為跑馬拉松減咗十幾磅。
Vincent話澳洲依家正值冬季，所以佢跑馬拉松嗰日都只係得十度左右，但因為陽光普照，所以天氣都算乾爽，跑得幾舒服咁話。不過雖然天氣宜人，但因為擔心太太胡可兒一個人湊三個囝囝辛苦，Vincent都不敢久留，跑完馬拉松、極速探完喺新西蘭嘅朋友，前後唔夠一星期就返咗香港喇。
Vincent為咗報答太太放佢假、畀佢去澳洲跑馬拉松，都好識做咁陪番太太同三個囝囝去台灣旅行，一家五口仲去咗台中嘅飛牛牧場，認真開心。
