政壇：慢必拍枱傷手要針灸
立法會早前「拉布」停不了，搞到主席曾鈺成都要用「多事之秋」總結今年工作。有份大肆「拉布」嘅人民力量陳志全（慢必）繼「拉布」出現坐骨神經痛，要去搵人推拿按摩後，又因為喺財務委員會審議新界東北發展前期工程撥款時拍枱，右手整傷，要去港大中醫藥學院做針灸紓緩痛楚。
陳志全之前「拉布」嘅時候出現坐骨神經痛，要去搵人推拿按摩。（資料圖片）
「慢必」陳志全因為「拍枱」拍到手痛，要去睇中醫做針灸紓緩痛楚。（互聯網圖片）
慢必話，自從上月拍枱之後，佢隻右手就開始出現問題，之後去健身一發力都會覺得痛。初時佢都唔為意，但點知近日情況愈來愈嚴重，連拎重嘢都會覺得痛，於是佢尋日去咗港大中醫藥學院中區臨床教研中心睇中醫，仲順便做埋針灸治療。不過，佢話第一次做針灸無乜特別感覺，要做多兩至三次先會有顯著成效，又話以後都唔會用手拍枱，會改用其他物件拍枱，確保唔會再次因工受傷喎。
