政壇：青年置業首期要儲14年
置業有幾難？有機構調查發現，喺香港要儲得起可以買樓嘅首期，一個21歲嘅畢業生如果打份月入萬幾蚊嘅工，最快都要到35歲先儲夠錢畀首期上車，即係儲首期都要十四年。而且，佢哋發現依家好多後生仔都唔係想像中咁大花筒，識得及早儲錢！
馮雪心話，好多後生仔並唔係咁大花筒，仲早早儲錢買樓添。
根據調查發現，有四分一嘅三十歲以下年輕人視買樓為最想實現嘅人生目標，仲多過擁有高學歷（15.5%）同環遊世界（11.5%）。康宏行政總裁馮雪心就舉例講述青年人買樓嘅苦況，如果一位月入12,000蚊嘅畢業生，個個月儲起三分一人工，即係4,000蚊，就算每年加薪5%，都最少要14年先儲到三成首期（90萬元）買個300萬嘅單位，所以佢建議年輕人盡早開始理財。據講，依家已經有八成年輕人話自己有儲開錢，事關有太多人想買樓，所以咪及早儲備囉。
