同名同姓,誤會唔少。日前,中共前政治局常委周永康涉嫌貪腐嚴重違規被立案審查,呢單新聞唔止震撼中港政圈,仲連本地學界都有唔少人關注,其中一個原因係學聯秘書長亦叫周永康,日前消息傳來時,有人誤將馮京作馬涼,鬧出一場虛驚!

設計圖片及對白

大專生唔知講唔通

學聯嘅周永康話,呢幾日佢帶病在身,無乜上網,亦較少睇新聞,前日突然有朋友仔問佢係咪被調查,搞到佢都打咗個突,即刻上網睇吓發生咩事,一睇先知原來係前政治局常委周永康被中共中央立案審查。同時佢又發現有老友喺社交網站問佢係咪被捕,仲有記者問佢點算好,搞到佢都唔知畀咩反應。所以,學聯嘅周永康即刻拿拿聲澄清一番,咁先放心啲。

不過,由連串反應看來,似乎搞錯周永康嘅人都唔少。要知道,今次中央調查涉貪嘅周永康係一件好突破嘅事,呢個周永康係中共前政治局常委,加上佢嘅貪腐醜聞同中央「打老虎」消息已被廣泛報道,作為大專生一族,應該都有多少了解。如果話有關人士只識學聯嘅周永康,而唔識涉貪嘅周永康,似乎講唔通;但如有記者搞錯就更加離譜。希望呢個情況只係出現喺少部分大專生,而唔係大多數啦。

講開又講,依家中學已經加咗通識科,唔少人都話中學生比以前更關注時事,今次周永康事件嘅誤會,再次提醒學界,本地學生對香港以外嘅人與事,仲係了解得唔夠。有口痕友就話,學聯嘅周永康被查,本港媒體嘅關注度會咁高咩?電視台亦未必會喺電視畫面側出流動提示喇。而且,中紀委查得嘅,亦唔會係學聯嘅周永康喇……可見,接收資訊都要用心思考至得。

第一手消息請下載on.cc東網iPhone/iPad/Android/Windows Phone Apps