在此講了幾日書展，原來不打算再講的了！但尋日睇報紙，見那主辦單位的香港貿易發展局話今年書展入場人次有一百零一萬，創二十五年來的新高，又話人均消費九百八十七元云云。

愛國的《文滙報》大字標題：「有出版社生意大增150%」，喂！有無寫錯，一百五十巴仙？但全篇內文都無提係邊間出版社！

大話精政府真巴乜閉，只上台十八個月，已將香港道德完全摧毀，所有權貴講大話都唔眨眼！

筆者我日日由朝到晚，寸步不離的孵住喺書展場中央，連同書業行家互相交流消息下，肯肯定今年人流大減，生意下降，否則，都唔使有攤位由一百蚊七本劈價到一百蚊十八本啦！玩呀！

他媽的滷味蟹！人均消費九百八十七？有參展商賣到兩蚊一本書呀！仲要送豉油，有啲送啤酒！

除了愛國大集團和無誠信的報章胡謅外，貿發局的廢柴庸才更是罪魁禍首，以上大話都敢作得出！嗱！不單止參展商做證今年人丁不旺，連記者也親身目睹啦！怎可失實亂報o架！嗱！我就最公道的！書展七日內，係有過人多入場時刻，就係星期六上午和星期一傍晚，入場的人確實呆等兩小時未能入場，其中原因，只不過係會展人潮管制超級失敗所致，叫書迷鼓譟！若貿發局頭目唔想畀我插佢弄虛作假，自吹貪功，我當眾呼籲，請貿發局交盤數公開畀大家過目，係咪有咁多人入場！嗱！係單獨書展的帳目，並非周啟良所講的貿發局全年活動收支的總帳簿呀！

自我塗脂抹粉背後，除有人邀功外，更製造假象，係咪想明年乘機加價先？

當文化盛事，有大話精的影子摻入，就一定有不可告人的利益，另行在「進行中」，好卑鄙！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps