城中鏡：姚珏 王英偉老友樂聚
香港藝術發展局搞咗個創意藝術雙周活動，前日喺中環大會堂舉行開幕禮，打頭陣係著名小提琴家姚珏夥拍第六屆國際指揮大賽冠軍林大葉演出嘅港深交響樂之夜。當晚中場休息期間，見到藝發局主席Wilfred王英偉同姚珏喺後台雞啄唔斷，原來二人識於微時，姚珏話Wilfred叫到佢幫手，一定唔可以托手（月爭）喎！
姚珏（左）同王英偉相識多年，大家都唔會托對方手（月爭）。
藝發局請到姚珏（圖）同林大葉合作演奏悠揚樂章。（受訪者提供）
林大葉
識於微時 幫手即到
講到識咗幾耐，Wilfred話耐到唔記得咗，但佢笑笑口話由姚珏變成一個靚女開始就已經相識，起碼有十幾年，但最初碰面喺乜嘢場合已經冇晒印象喎！至於身旁嘅姚珏憶述，佢十幾歲嗰陣仲係肥妹仔一名，大個咗先開始愈來愈瘦。見佢當晚穿上紅色修身高衩晚裝，弗爆身形表露無遺。佢就話冇刻意修身，只係因為性格好動，又經常頻撲各地演奏，閒時仲熱愛游水，所以唔使戒口都自然變瘦。
近年四出表演嘅姚珏，講到聽眾水平時，就話由於香港喺藝術、音樂等方面推廣做得比較好，所以普遍嘅聽眾質素都好高，好多中小學生對音樂及藝術都有一定認識，相比二十幾年前，識欣賞嘅就多咗好多喇。不過，佢認為內地音樂學院及樂團數量較香港多，所以「專業聽眾」就內地多啲咁話。
姚珏認為香港有唔少針對青年音樂家嘅培訓，但佢哋最需要嘅唔係錢，而係一個舞台同不斷演出嘅機會，咁先可以進步。香港喺引進世界各地音樂家方面做得好好，但想培育本地人才，就要畀多啲機會佢哋先得喇！
