政壇：搞搞政：官員縮短暑假備戰政改
立法會本月中已開始休會，十月先至復會，中間呢兩個多月係官員、議員休養生息嘅好時機，但今年卻例外，事關承接早前公布嘅兩份政改報告，特首啟動政改首部曲，向全國人大常委會提交報告提出修改一七年特首選舉辦法，常委會料於八月下旬商議議程，同月最後一周舉行一連多日會議，外界預計政改報告會榜上有名，會後更有「一錘定音」嘅決定，為政府年底次階段政改諮詢定下權威框架。
設計圖片及對白
8月15號前歸隊
由於政改一役不容有失，消息指至少特首辦、由政改三人組之一嘅譚志源所領導政制及內地事務局同民政事務局等各級人員，最近陸續收到溫馨提示，最遲要於八月十五日歸隊為政改備戰，提早「收風」同做好輿論鋪墊工作，換言之相關官員放暑假會比非政改年少放起碼一個多月，但考慮到政改成敗，關乎到現屆政府餘下兩年會否淪為「跛腳鴨」管治，無論在公在私立場出發，共同犧牲假期進入作戰狀態，似乎係無辦法中嘅辦法。
最近官場流傳一個傳聞，原來有「空降」加入政府嘅官員認為，立會休會期長達兩個多月算係放得比較耐，建議可否縮減休會時間，利用慳番嘅時間去處理積壓嘅工作。
據聞有資深官員笑言，立會休會期好重要，因為係全年唯一可以回一回氣嘅時間，其後多名官員都開腔和議呢個看法，睇怕呢個「空降」官員慳番啖口水好過嘞！
