政壇：羅貴生同柴油車講拜拜

立法會啱啱通過延長對電動車嘅首次登記稅豁免，所以買家就有得受惠每架豁免至少六十七萬幾嘅稅項。羅生話最先收到貨嘅一部Signature S會自用，而剩低嘅七部就會租畀酒店作商業用途，但目前只有一部有酒店認頭，佢話其他就仲傾緊，未成事。

羅生之前用咗幾萬蚊喺屋企安裝咗私家充電站，但佢都會擔心隨住電動車愈來愈多人揸，出去等叉電條車龍會愈來愈長，佢話站喺用家角度梗係想總有一個充電站喺左近，希望政府幫手興建更多充電站。

佢話之前一路都有揸開電動車，不過係副車，佢仲話收到新車就會賣晒柴油車，依家開始只鍾情Model S，貪佢環保零排放。Die Heart Fans嘅佢仲訂咗一架Model X，預計最快出年先面世，佢話先睇Model S嘅反應先再考慮會唔會加碼訂多啲。