有「香港文化教父」之稱嘅「進念．二十面體」創辦人Danny榮念曾揚威日本！喺亞洲文化界一直舉足輕重嘅Danny榮獲第二十五屆福岡亞洲文化獎「藝術文化獎」，呢個「遲來的榮譽」令佢同過往得獎嘅諾貝爾文學獎得主莫言、日本知名導演黑澤明同本地著名導演許鞍華齊名。

設計圖片及對白

Danny身兼西九文化區管理局董事局成員滿六年，十月卸任在即，但佢感慨斥資過百億元打造嘅西九「冇人睇住」兼淪為「文化消費中心」，唔通西九未出世已淪為「孤兒仔」？

倡重設文化委員會

Danny慨嘆業界多年來都係「靠自己」，即使六年前加入西九董事局，對佢嚟講談唔上係權力或榮譽，而係一份責任，佢更以「雙重全職（double fulltime）」嚟形容呢個即將卸任嘅公職。佢認為就算政府近年銳意打造西九文化區，喺官僚主義下一直缺乏長遠文化發展藍圖，浪費香港作為中國最重要嘅軟實力力量，要成為國際文化交流中心仲有漫漫長路要走，而政府官員抱住「唔做唔錯」嘅心態度日更係致命傷。

點解咁講？佢舉例話，新政府上場後成立文化局觸礁，佢認為政府可以先重設早年閒置咗嘅「文化委員會」，可惜佢連番周旋多個決策局游說都不得要領，而身兼西九董事局主席嘅政務司司長林鄭月娥忙於籌備政改，難以分心「照顧」西九。政府有幾重視文化？市民都心照喇！

適逢財爺鬍鬚曾尋日親自到場祝賀，Danny笑言已即時把握機會捉實鬍鬚曾「施壓」，促請政府整合現有資源，香港文化產業先有辦法更上一層樓。唔知今次踢唔踢得郁鬍鬚曾呢？

第一手消息請下載on.cc東網iPhone/iPad/Android/Windows Phone Apps