城中鏡：高錕畫出「啟示」
光纖之父高錕多年前患上俗稱「老人癡呆症」嘅腦退化症，雖然早已忘記自己曾經係諾貝爾物理學獎得主，甚至連點樣執筆都唔記得，但佢去年十月在太太黃美芸及畫班導師鼓勵下重新習畫，由起初揸起支畫筆連畫布都掂唔到，到成功喺畫布上一點、一畫，甚至完成一幅畫作，對高錕嚟講都係大躍進，高太並藉此勉勵年輕人愛上閱讀唔係難事。
高太黃美芸睇住丈夫嘅畫作《啟示》，笑得好開心。
高錕（右）近年因患上腦退化症已經深居簡出，幸得太太黃美芸（左）一直體貼照顧。（資料圖片）
高太尋日代表高錕出席一個「書迷」比賽頒獎禮，提到丈夫近況，雖然已經冇能力重新閱讀，但一樣可以執起畫筆做「畫家」。高太憶述，高錕去年初次執筆，由於腦退化症患者一般缺乏耐性同集中力，對距離同空間等抽象思維嘅認知都有困難，所以起初連畫紙都掂唔到，只係畫空氣。幸得高太同導師不斷從旁鼓勵，高錕先可以慢慢重拾信心，更喺年初完成首幅畫作。
盼鼓勵青年閱讀
高錕嘅導師Polly將其畫作命名為《啟示》，透露高錕透過鮮艷奪目嘅顏色勾勒出一個花籃，反映佢思想上嘅改變，由起初嘅迷惘、好怕接觸畫布，到識得手執畫筆喺畫布上自由自在咁繪畫，係好大嘅進步。高太亦藉先生嘅「大躍進」，鼓勵年輕人要愛上閱讀都唔係咁難。
