設計圖片及對白
由香港五大飲食業商會聯手舉辦嘅《香港味之年賞》，早前敲鑼打鼓招募五十名神秘食客，為今年底出版嘅港版米芝蓮進行評選，以抗衡西方味蕾操控本土美食命脈。點知，依家已有最少十位神秘食客中途退出計劃，其中一個原因係香港地百物騰貴，由主辦機構提供每餐三百元餐費經常唔夠埋單，食客搞到要自付金牛補貼，搞手之一嘅稻苗學會前主席黃傑龍頭痕之餘，仲話來年要諗多啲計至得。
呢個計劃今年三月推出，有三百多人報名做神秘食客，經過精挑細選，大會揀咗五十人，每人透過抽籤被分派往十間食肆試味，每餐可獲三百港元津貼，但唔少食肆收費高昂，有十位食客因為對食得豪感到「好乸脷」，決定退出計劃，大會惟有邀請餘下四十位神秘食客頂上，即係每人食多幾間。
度橋開源增補貼費
黃傑龍解釋，大會為咗保持公信力，所以拒絕任何食肆贊助，只係自行籌得逾百萬元經費，點知到頭來遇到咁嘅問題，所以明年要再搵多啲開源方法，將補貼費用提高，否則想搵人試食都難。
第一手消息請下載on.cc東網
