政壇：陳秉強為妻離職唔等滬港通出世

成日都有人講夫唱婦隨，但港交所「滬港通」主將之一嘅陳秉強，就一於反轉嚟，實行婦唱夫隨。事關陳秉強已向港交所請辭，仲趕喺九月二十日正式離職。「滬港通」十月就出台，點解陳秉強唔等到個Baby「滬港通」出世呢？原因咪係太太調職，佢哋要一齊離開香港囉。

陳秉強辭職已獲港交所接納，他將於九月二十日離任。（資料圖片）

據講，陳秉強太座係公務員，將要調到瑞士日內瓦工作幾年，所以陳秉強要舉家搬過去日內瓦住。由於係工作關係，亦冇辦法等到「滬港通」出咗台至走。不過，港交所大派定心丸，話佢離任前會繼續參與「滬港通」工作，大家唔使擔心！

其實陳秉強唔撈嘅消息一啲都唔意外，今年四月，市場就傳出佢辭職，但獲行政總裁李小加挽留，同意做到九月底。當時市傳佢由十月一日起放九個月無薪假，放完假後可能重返工作崗位。但根據昨日嘅講法，佢嘅請辭已獲港交所接納，佢會正式離職。