兩名G4喺店舖前交頭接耳，視察周邊環境。
警方保護要人組（G4）前日疑在金鐘某商場演習保護要人嘅路線同時間掌握。話說前日下午兩點幾，有兩名G4並排企喺某大型時裝品牌店舖前交頭接耳，差唔多十幾步之隔，又見到兩名身穿背心嘅G4環望四周，不消一會有疑似扮演「要人」嘅G4，由該店舖行出來。
G4一擁而上以「品」字形保護「要人」（中）。
此時一早部署喺店舖附近嘅六名G4一擁而上，將「要人」品字形圍起保護，其中負責殿後嘅G4，仲不時將目光望向高位視察，一行人隨後搭扶手電梯離開商場，進入香港公園後就失去蹤影。
正所謂事出必有因，一批G4突然出動演習保護要人嘅路線，有人估計得兩個原因，一係港府高層即將出巡鬧市，另一估計係有其他國家政要即將來港，指明去金鐘呢個商場購物，因此要預先演習路線。究竟有何許大人物出巡，大家要密切留意喇！
第一手消息請下載on.cc東網
