政壇：立會秘書處計錯數認衰
立法會今個立法年度工作已經完成，早前我哋都跟進過議員工作表現，譬如立法會資訊科技及廣播事務委員會（委員會）部分建制派委員出席率唔夠四成。不過，有議員就有反彈，仲揭發立法會秘書處資料出錯。尋日呢個委員會再開會，涉事嘅金融服務界張華峰同金融界吳亮星（星爺）紛紛「伸冤」，實行要扭秘書長陳維安耳仔。
設計圖片及對白
尋日嘅會議上，張華峰同星爺就澄清，話自己出席委員會嘅比率有八成以上，問秘書處有冇搞錯，並要求澄清。委員會秘書就承認計錯數，以今個立法年度計算，張華峰同議員蔣麗芸（Ann）出席率都有八成八，吳亮星就有八成二。
星爺話，呢個委員會係最高資訊科技嘅一個委員會，唔明點解出現資訊問題；而張華峰仲話自己好捧主席黃毓民場添。秘書話，同事會將所有數據入咗電腦系統，但唔知點解同事輸入嘅資料同出來嘅報告唔同，今次搵唔到原因喎。秘書處事後回覆，經調查後，出錯係因為相關議員出席率資料未及更新。
長毛扮搶阿Ann板腦
講開阿Ann，佢前日喺政制事務委員會講政改諮詢報告時，嫌「長毛」梁國雄個鳥籠遮住佢視線，擅自「充公」咗個鳥籠。唔知呢個舉動係咪搞到長毛一肚氣，佢尋日趁資訊科技及廣播事務委員會開會時，就動作多多，扮想搶走阿Ann枱面部平板電腦，好似小朋友要報復咁，阿Ann就笑笑口話：「咁小器，攞你個鳥籠玩下啫！」長毛事後唔認係小器，仲用普通話講「想都沒想過」，阿Ann就解釋，當時攞走鳥籠係唔想長毛掟嘢，唔係唔還喎。
