啟德郵輪碼頭曾被揭發大樓滲水、鼠患嚴重、交通配套不足，啟用至今仍「甩漏」多多，真係唔知點吸引郵輪停泊，實在慘不忍睹，李衞於是搵商經局局長樑樑問話。

李衞：郵輪碼頭造價閒閒哋都80億，但啲設施咁差，點搞呀？

樑樑：設施仲係發展中，畀少少耐性。

李衞：我等得，啲旅客都唔等得啦！連餐廳都冇，肚餓都唔知點算！

樑樑：就快開業，等吓啦……

李衞：至弊出去醫肚、睇吓嘢，的士站連車都冇呢！

樑樑：等吓等吓，就有車嘅……

李衞：仲等？碼頭根本同荒島冇分別，真係咩賣點都冇！

樑樑：冇餐廳、冇的士、大樓滲水、鼠患嚴重等等，你哋唔係去睇過，又點會有嘢畀你哋鬧吖，呢啲仲唔係賣點係咩？

李衞：&*&^%#*@!!!!!

第一手消息請下載on.cc東網iPhone/iPad/Android/Windows Phone Apps